Өткен сейсенбі күні Алматы қаласының тұрғыны Нүрилә Әпшүкірова жүз жылдық мерейтойын атап өтті. Қарт ананы мерейтойымен құттықтауға туған-туыс пен жақындары ғана емес, сондай-ақ «Нұр Отан» ХДП-ның Алмалы аудандық филиалының төрағасы Марат Пірінбеков және ардагерлердің аудандық кеңесінің төрағасы Зекен Әділбеков те келді. 

Нүрилә Әпшүкірова 1910 жылдың 18 мамыры күні Талдықорған облысы Алакөл ауданы Қарақұм ауылында дүниеге келген. 13 жасынан бастап колхозда жұмыс істей бастады. Бұл аудандағы жерлердің барлығы суармалы жерлер. Жасөспірім қыз жастайынан-ақ арық тазалау, егістікке су жіберу, арамшөптерді отау, кетпен шабу, қол орақпен ору тәрізді шаруа жұмыстарының ауыртпашылықтарын көріп өсті.

Егісті жинау науқаны басталған кезде колхоздағы әйелдердің еркектермен теңдей жұмыс істеуіне тура келді. Бұл асырып айтушылық емес. Нүрилә бой жетіп, бекіген кезде, оған ең ауыр жұмыс тапсырылады. Шабындықта, тіпті, еркектердің ішінде оған тең келетіндері болмады деп жатады, еркектердің кез келгені бір күнде бір гектар жерді ора алмайтын, ал бұл іс Нүриләнің қолынан келетін!

Нүрилә 18 жасында тұрмысқа шығып, төрт баланың анасы атанады. Бақыт деген осы екен деп ойлайды. Бірақ, сұрапыл соғыс басталады. Күйеуі 41-жылы майданға кетіп, 42-жылы қазаға ұшырайды (Калинин ауданында жерленген), сұлу Нүрилә екінші рет тұрмыс құрмайды. Оны ойлауға да мұрша болмады дейді.  

1946 жылы ауыл тұрғындары Нүрилә Әпшүкірованы аудандық кеңестің депутаты ретінде, 1948 жылы облыс депутаты ретінде сайлайды. Ал 50-жылдардың басында республика астанасына партиялық съездің делегаты ретінде жібереді.   

Нүрилә апамыз, міне, осындай, ақылды, сұлу әрі колхоздың үздігі мен мақтанышы болған.

Мерейтойға келген меймандар апамыздың жас шағында үлкен шаруашылықты басқарып, барлық іске үлгеріп, алдыңғы қатарда болғандығын тағы да еске алысты.   

Алайда, апамыз бүгінде қайратты, жарқын жүзді адам. Туған-туыстары мен жақындары апамызды мақтан тұтады, жасы ұлғайған шақта ол біреудің көмегіне зәру емес, үй шаруасымен шын көңілімен айналысады, тіпті, өзіне-өзі киім де тігіп алады екен! Көзі де, қолы да сау.    

Еңбек майданына қатысушының зор еңбегін жергілікті үкімет те естен шығарған емес. 2003 жылы оған Алматы қаласынан бір бөлмелі пәтер берді, бұнда ол немересімен бірге тұрады. Ал жалпы, Нүрилә апаның қазір 5 ұрпағы өрбіген: балалары, немерелері, шөберелері, шөпшектері, неменелері. Барлығы 70-тен астам адам бар.  

Егер Нүрилә апамыздың ұрпағына осы кісінің денсаулығындай мықты денсаулық берсе, қазақстандық ұзақ өмір сүрушілердің тобы қалайша толыға түсетіндігін елестетіңіздерші! Егер де оның еңбек сүйгіштік қасиеті берілетін болса ше? Онда тіпті, тауды төңкеріп жіберуге де болады!  

Осы жағдайда ескере отырып, мерейтой иесі Нүрилә апаны ғана емес, оның барлық ұрпақтарын да құттықтаймын! 

Мәтінді дайындаған: Татьяна Влади, Алматы.

Пірінбеков Марат Үсенұлы. Ғасырдан да ұзақ…// «Страна и мир» республикалық апталық қоғамдық-саяси газеті. 22.05.2010 ж.
http://sim.kz/?p=5894#more-5894

Бет 1