Құсман Шалабаев. Алауың сөнбесін, Алаш баласы!// Алматы ақшамы. №4 (4406), 15.01.2011

Алматыға осыдан үш жыл бұрын Алау келген. Бірақ, ол қазақтың еншісіне бұйырмаған, сағымдай өте шыққан Бейжің Олимпиадасының алауы болған-тын. Енді бұл жолы, арнайы Алматы мен Астана қалаларында өткелі отырған VII Қысқы Азия ойындарының алауы Алматыға келді. Бұл тек алматылықтар үшін ғана емес, барша Алаш жұрты үшін үлкен қуаныш болды.

Алау эстафетасы ең көрікті орындармен көше аралап жүретіндігі үрдіске айналған. Қазақ даласына тұңыш рет келген Олимпиада алауы «Медеу» мұз айдынынан бастау алса, бұл жолы жаңадан бой көтерген Ремизовка шатқалындағы Халықаралық трамплиннен тұтатылды. Басында белгілі болғандай, Азиада алауын Алматы қаласы бойынша 80 адам алып жүрді. Жас ерекшеліктеріне карай ең азы — 80 метр, ең көбі 200 метрді бағындырды.

Сондай-ақ, кейбір алаугерлер үшін өзінің кәсіби спортындағы бір сәттік көрінісін алаугер ретінде де сомдауға тура келді. Мысалы, Алматы қаласындағы ең жас алаугер атанған Е.Тұрубаев есімді велошабандоз 31-болып Сәтбаев көшесінің бойымен шырағданды велосипедпен алып жүрсе, Алматы қаласының намысын қорғап жүрген көкпаршы Елдос Тілебалдиев Абай даңғылының бойымен шырағданды аттың үстіне алып жүрді. Қалай болғанда да, алматылық алаугерлердің дені қазақ спортының тасын өрге сүйреп жүрген саңлақ спортшылар мен спорт тақырыбында қалам тербеген ардагер журналистер, аудан басшылары мен әртүрлі қалалық құрылымның жетекшілері болды. Енді, сол бүкіл қазақ даласын жарықка бөлеген Азиада шырағданын алып жүрген алғашқы алаугерлердің алған әсері туралы тоқталып өтсек.

Тараздық алаугерлердің толғанысы

Алматыда тұтанған Алау шырағданы Тараз қаласына жол тартқан болатын. Онда да қазақтың менмін деген атқамінерлері мен ардақтылары алау ұстады. Алайда, олардың барлығының тумысы Жамбыл облысынан болғанымен, барлығы бірдей бұрнағы күні Алматы қаласының тұрғындары болып есептеледі. Сондықтан, Алау эстафетасының екінші күні Тараз қаласынын көшелерімен шырағданды алып жүрген алаугерлердің де қуанышымен бөліскен едік...

Асанәлі Әшімұлы, ҚР Халық әртісі:

Тараздың тарихында болмаған оқиға

- Бүгін Азиаданың, сондай-ақ Тараз қаласының тарихында бұрын-соңды болмаған Алау эстафетасы өтті. Азиаданың Алау эстафетасын Алматыдан қабылдап алған Жамбыл жұртшылығы үшін жалыны шарпыған шырағданның аймақтар бойынша бірінші Тараз қаласында өтуі расында үлкен мәртебе, зор қуаныш. Алауды алып келе жатқанымда ерекше тебіреністе болдым. Алау эстафетасына қатысқаным мен үшін тарихи күн. Бұл Азиада тарихына жазылатын жаңа парақ. Уақыт өтеді, алайда бүгінгі түсірілген кадрлардың ертеңгі жас буынды отан сүйгіштікке тәрбиелеуде, спортқа баулуда маңызы зор болмақ.

Алауды алып келе жатқаньмда байқағаным, бүгін Жамбыл жұртшылығынығ көңіл-күйі жоғары, көне шаһар тұрғындары Алауды шаттықта қарсы алды. Біздің халық әр уақытта жақсылықты ерекше қабылдай біледі, ерекше қуана біледі. Осыған қуандым. Тараз тұрғындарын Азиаданың Алау эстафетасы мерекесімен қуттықтаймын. Еліміз үшін аянбай еңбек етейік, бірлікте болайық. Қазақстанның күн санап артып келе жатқан мәртебесі биіктей берсін. Азиада алауын барлық сән-салтанатымен жоғары деңгейде өткізген ұйымдастырушыларға алғысымды айтамын. Енді жалынымен шарпыған шырағдан Шымкент шаһарына жол тартпақ. Одан әрі еліміздің барша облыс орталықтарын аралап, Азиада ойындарының идеясын әрбір қазақстандықтың көкейіне дарытады, рухын барлық аймағымызға жеткізеді. Бұл ұйымдастырушылардың ұтымды қадамы дер едім.

Санаулы күндерден кейін жалауы желбірейтін дүбірлі додада Қазақстан спортшыларының мерейі үстем болып, қоржынымыз жулдеге толсын!

Болат Жұмадилов, бокстан екі дүркін Олимпиада ойындарының күміс жүлдегері, Әлем чемпионы:

«Өз үйіңде шымшықтың шықылықтағаны да күш»

- Ең алдымен VII Қысқы Азия ойындары — посткеңестік кеңістікте 1980 жылғы Мәскеу Олимпиадасынан кейінгі тұңғыш рет ұйымдастырылып отырған үлкен спорпық шара екенін, Кеңес өкіметі ыдырағаннан кейін өз алдына отау құрып, Тәуелсіздігін алған мемлекеттер арасынан алғаш болып Қазақстанда осындай әлем халқы назарын аударатын ірі дода өткелі отырғанын мақтанышпен айтқым келеді. Президентіміз ел экономикасымен қатар, спортты дамытуға баса көңіл бөліп, үздік спортшыларды тәрбиелеуге барлық жағдай жасап келеді. Күні кеше өткен Астанадағы дүние жүзі елдерінің басшыларының басын қосқан Саммиттің ізін ала қос әсем қаламыз — Алматы мен Астанада құрлықтың 30-ға жуық мемлекетінен мыңдаған спортшы қатысатын үлкен спорпық жарыс жалауын желбіреткелі отыр. «Өз үйінде шымшықтың шықылықтағаны да күш» демекші, Азиадада спортшыларымыз еліміздің намысын абыроймен қорғап, жанкүйерлері артқан сенім үдесінен шығатынына сенімім мол. Ал Алау эстафетасының еліміздің барша облыстарын аралауы — Азия ойындарының идеясын өскелең ұрпақтың көкейіне дарытуда маңызы зор шара деп білемін. Осындай кең ауқымды қаламыздағы Азиада эстафетасында Алауды алып жүру бақытына ие болғаныма қуаныштымын. Елдің бетке ұстар спортшыларының қадірін біліп, құрметтейтін Әулиеата жұртына разымын. Бұл мен үшін зор мәртебе, өмірімдегі жарқын сәттердің бірі деп есептеймін.

Мейрамбек Бесбаев, мәдениет қайраткері, «Мұзарт» тобының әншісі:

Естен кетпес оқиға болары анық

- Азиада ойындары секілді ғалам тамашалайтын ірі додалардың бірінен саналатын мұндай дүбірлі доданы өткізу еліміз үшін айрықша оқиға екені сөзсіз. Әлемдік аренада Қазақстан мемлекетінің таныла түсуіне зор септігін тигізетін мұндай дүбірлі доданың өтетіні жүрегі қазақ деп соққан еліміздің әрбір азаматы үшін кеудесіне мақтаныш ұялатар, шаттыққа бөлейтін, рухты көтеретін тарихи сәт деп білемін. Осынау еліміздің еңсесін көтерер, мерейін өсірер жарысты қазақ халқы абыроймен өткізетініне сенімім мол. Азиада ойындарының туған жерімде өткен Алау эстафетасына қатысқаныма қуаныштымын. Өнерімізді бағалап, елдің азаматы еді деп құрмет көрсеткен жерлестеріме алғыс айтамын. Тарих беттерінде өзіндік қолтаңбасымен қалатын Азиада ойындарының Алау эстафетасын алып жүрген бүгінгі күн өмірімдегі естен кетпес оқиға болары анық. Ерекше тебіреніп, көңілді толқытқан сәттен алған әсерім шексіз.

Қазақ елі келешекте әлем чемпионаттары мен Олимпиада ойындарын қабылдайды деген ойдамын. Азиадаға қатысатын еліміздің спортшылары Әнұранымызды шырқатып, Көк байрағымызды желбіретеді деген үміттемін. Қазақтың абыройы асқақтап, мерейі таси берсін!

Құсман Шалабаев, Алматы қаласы Мәслихатының депутаты, Азиада алаугері:

Азиада алауының Алматыдан басталуы қаламыздың беделі биік екенін көрсетеді.

-          Мен Азиада алауын «Алматы» қонақ үйі тұсынан қабылдап алдым. Мұнда Абай атамыздың атындағы Опера және балет театры орналасқан. Яғни, қаламыздың ең көрнекті, мәдени орталықтарының бірі. «Хан батыр» атанған Қабанбай батыр көшесі мен Абылай хан атындағы даңғылдың түйіскен тұсына дейін Азиада аталатын жерде менің көңіл-күйім бабалар аманаты ақталып жатқандай әсерде, жоғары рухқа толы болды.

Шын мәнінде, Қазақ елі мұндай ауқымды спорттық доданы алғаш рет қабылдап отыр. Азиада ойындарын сары құрлықта Қытай, Жапония, Корея сынды елдерден кейін төртінші болып Қазақстан өткізгелі жатқаны белгілі. Ал, Алау эстафетасы бұған дейін құрлықтық бәсекені өткізген елдерде ұйымдастырылмаған. Сондықтан, еліміз Азиада алауы эстафетасын тұңғыш қолға алып, жақсы үрдіске бастамашы болды.

Бұл – мемлекет басшысы Нұрсұлтан Назарбаевтың тұрақты, бағдары айқын саясатының арқасында мүмкін болып отырғаны жасырын емес. Қала Әкімі Ахметжан Есімов те спортқа бейіл азамат.

Азиада алауының Алматыдан басталуы да біздің қаланың беделі биік, абыройы жоғары екенін көрсетсе керек.

Жалпы, менің ойымша, Қазақстан Қысқы Азия ойындарын өткізу арқылы тағы бір биіктікті бағындырғалы отыр. Азиада алауы ө соның сүйінші хабары іспетті. Яғни, жыл жақсы басталды. Ырымшыл халықпыз ғой. Жақсы іспен ьасталған жыл елге де берекелі болмақ.

Алау эстафетасының жас ұрпаққа берер тағлымы, тәрбиесі – спортқа деген іңкәрлікті оятуда жатыр деп білемін. 

Құсман Шалабаев. Алауың сөнбесін, Алаш баласы!// Алматы ақшамы. №4 (4406), 15.01.2011

Сканерден өткізілген нұсқасы

Бет 1

Бет 2

Бет 3

Бет 4