Сол кезден бастап 6 жыл өтті. Біз Данамен тағы кездестік– тамаша күлкісі баяғы қалпында. Бірақ, біздің бұл кездесуімізге оның өміріндегі мүлдем басқаша жеңіс себеп болды. Әйелге тән жеңіс! Енді Дана жаңа әрі өте беделді мәртебеге ие болды: ол кішкентай ғана сұлу қыз Алуаның анасы атанды. Қызы қазір 8 айлық. Дана Толеш өміріндегі өзгерістер туралы баяндап береді. 

Қазір өзімді Қазақстан аруы болған кезбен салыстырғанда ойыма оралатыны, сол жылдары балапан сияқты болыппын, ал қазір қанат қаққан құсқа ұқсаймын. Осы уақыт аралығында аймақтану (жұмысымның негізгі аймағы - Еуропа) мамандығы бойынша білім алдым, түрік және ағылшын тілдерін меңгердім (жолдасым маған қолдау көрсетіп, желеп-жебеп жүреді). Мен ересек адам болдым, ана болдым, енді менің отбасым, жолдасым, бүлдіршіндерім бар, меніңше, бұл өзіңді оң жағыңнан көрсететін қыр сияқты. 

Суқұйғыш белгісі

Бұрын мен балаларға байсалды қарайтынмын, алайда өз балаң бәрін өзгертеді екен, әлем өзгеше, өте қызықты болып кетті. Жұлдыз жорамалы бойынша мен суқұйғышпын, бұл белгінің ерекше сапаларының бірі – әр нәрсеге мұқият қарайды әрі көп еңбек жұмсайды. Бала біреуге немесе жеке саған ғана қажет болған үшін дүниеге келуі тиіс емес, бала жаңа адамға өмір беру үшін, оның барлық жағынан тұлға болып қалыптасуына көмектесу үшін дүниеге келуге тиіс деп ойлаймын. Бұл өте жауапкершілікті дүние. Өзімнің жүкті екенімді білген сәттен бастап-ақ, күнделікті оқу бағдарламасымен айналыса бастадым: осы тақырыпқа арналған бірқатар әдебиеттерді оқып шықтым да өзіме қажетті көптеген мәлімет алдым, болашақ сәбидің дамуына жақсы жағынан әсер ететін классикалық әуендер тыңдадым. Америкадан «Сәбилерге арналған классика» атты сериялардың дискілерін сатып алдым, онда классикалық әуен заманауи аранжировкамен беріледі, бұл балалардың қабылдауына анағұрлым жеңіл әрі құлақтарына жағымды. 

Жүктілігімнің алғашқы айларынан бастап-ақ Ғаламтордан қажетті ақпарат іздей бастадым, Мәскеудегі бірқатар курстар туралы білдім. Неге Мәскеу дейсіз бе? Өйткені Алматыдан мен екі апталық қана курс таптым, дегенмен бұл маған аздық етті. Анаммен бірге Мәскеуге бардық, ол жерде «САНЯ» - «Страна Абсолютного Нового Я» атты орталықта екі айлық курстан өттім. Анам әжелерге арналған курсқа, мен аналарға арналған курсқа барып оқыдық. Сондай-ақ әкелерге, аталарға, бауырлар мен әпкелерге арналған курстар бар екен, бағдарламалар алуан қырлы әрі ауқымды. Біздің әкеміз демалыс күндері келетін, алайда жұмысының көптігінен өкінішке орай, курстан өте алмады. 

Аналарға арналған курс өте ұнады: онда сәбидің жүйкесіне жағымсыз әсер ететін ештеңе болған жоқ. Жақсы білім алған мамандар сені болашақ сәби әлемімен біртіндеп әрі мұқият таныстырады, ал сәби дүниеге келген сәтте сен оны қалай күту керектігін білетін боласың. Бойыңда қорқыныш та, үрей де болмайды, сен тіпті, бала туудан кейінгі синдром сияқты дүниелерге де даяр боласың. Яғни, бұл бәрі тұтасымен жинақталған сауатты, дайын, жеңіл сызба болып табылады. Қызым дүниеге келген кезде дәрігерлер «Сіз бірінші емес, оныншы балаңызды туып жатқан сияқтысыз! Неткен байсалдылық!» деп өте қатты таңқалысты.

Жеке пікірім

Жүктілік кезінде УДЗ-зерттеуін дәрігерлер әлдебір патология болған жағдайда ғана ұсынады, ал егер бәрі қалыпты болса, бұл рәсімнен бас тартып, сәбидің жынысын білмей-ақ қоюға болады деген пікірде болатынмын. Мен УДЗ жасамадым, сондықтан не қыз, не ұл туылатынын білмедім. Қалай таңдауға болады? Бұл менің сәбиім ғой, оның үстіне алғашқым! Алайда, ұлға қалай жүкті болу керектігін мен енді білемін. Жақында Қытайда болдым, ол жердегі атақты емханалардың бірінде ата-анам ем қабылдады. Бұл елде УДЗ-дан кейін сәбидің жынысын хабарлауға тыйым салынған. Бұндай заңның қабылдануына Қытайдағы демографиялық дағдарыс себеп болды: 70% ерлер - 30% әйелдер. Оларға бір ғана сәби тууға рұқсат етілгендіктен, олар ұл туғанды қалайды, ал қыз болатынын білсе әйелдер бірден түсік тастатады екен. Сондықтан да олардың көбі ұлға жүкті болудың дәстүрлі ұлттық әдістерін біледі. Енді бұл құпияны мен де білемін, бірақ оны жарияламаймын - өзіме сынап көрейін...

Туған қабырға

Мәскеуде курстан өткеннен кейін, сол жерде босануды қаладым. Бірақ, Мәскеудің босану үйлерін қарап көргеннен кейін, Алматының босану үйлеріндегі жағдайдың жақсы екендігіне көзім жетті. Бала өзінің атамекенінде дүниеге келу керектігін түсіндім, бәлкім бұл жағынан мен ұлтжанды шығармын. Сен өз үйіңдесің, бәрі сенің туған тіліңде сөйлейді, осының бәрі ерекше көмектеседі. 

Қызым 22 қазанда туылды, мен 22 жаста болдым. Қазақстан аруы байқауында менің құтты нөмірім де 22 болған. Сондықтан да қызымның да жеңімпаз болатынына сенімдімін! Оған қоса, менің туылған күнім 4-і, яғни 2+2. Сондықтан 22 саны бізді шаттыққа бөлейді! 

Маған Сафия деген есім ұнады, бірақ әкеміз әлемдегі ең әдемі есім Алуа деді, демек Алуа Ерланқызы өте әдемі естіледі...

Зиялы қыз

Алуа өте нәзік. Біз сияқты белсенді әрі шуылдықтардан ерекшелігі ол – байсалды, босану үйінде-ақ дәрігерлер: «Қыздарыңыз зиялы екен» деген болатын. Бәлкім, классикалық әуен мен менің медитациям, сондай-ақ менің барлық істерді әбігерленбей, жағымсыз сәттерден қашқақтап, сабырлы жасағаным әсер еткен шығар. Алуашаның салмағы жеңіл, шаршатпайды, жалпы әлеуметтік тұрғыдан белсенді, қоғамды жаны сүйетін бүлдіршін, ұжымды жақсы көреді және кез келген жағдайда өзін жайлы сезінеді, сондықтан да Алуамен қай жерге болса да бірге баруға болады. Қазір ол модель бизнесіне аздап басын сұға бастады: екі жарнама ролигіне түсіп үлгерді. Біріншісінде памперсті, екіншісінде саяси партияны жарнамалады. Ол фотосуретке түскенді ұнатады және түсе де біледі, өзін-өзі фотосуретшілер талап еткен қалыпта ұстайды, дәл осы қасиетіміз үшін бізді шақырады. Бәлкім, бұл қасиеттер менің бойымнан берілген шығар.

Туылған сәтінен бастап қазірге дейін Алуаша газеттермен, журналдармен және фотосуреттермен ойнағанды ұнатады, оларды қайта орналастырып, парақтап, әйтеуір бірдеңе істеп отырады. Соңғы кездері түрлі түсті қытай бас қатырғышы оның сүйікті ойыншығына айналды. Алуаша тіпті, өзі жалғыз қалса да өзін жайбарақат сезінетін балалардың қатарынан, өзі ойнап, бірдеңе деп былдырлап, өлең айтып отыра береді, қасында біреу-міреудің болуы міндетті емес, десек те барлық жақындарымыз бен туыстарымыз Алуашамен ойнағанды жақсы көреді. 

Алуаша аса талғампаз, бірақ ерке емес. Оның бойынан көшбасшының қасиеттері көрініс тапқан, бұл әкесінен берілген қасиет. Әкесі қызын бәрінен қатты жақсы көреді, бос уақыты бола қалса тек қызымен өткізеді. Осындай қамқор әкені алғаш рет көріп отырмын! Олар ойнайды, күледі, ән салады, бір-біріне беріліп кетеді. Ал Астанаға жұмысқа кеткенде Алуаша фотосуреттерін сүйіп отырады. 

Туылған сәттен бастап Aлуаша күн сайын жарты сағаттан бассейнге түседі, ол үшін су – сүйікті стихия. Әуелі суда жүзгісі келеді, бәлкім, жүзуді үйрететін жаттықтырушы шақыратын кез келген шығар. Aлуа үнемі баршамыздың назарымызда жүреді, әжемізді, үлкен атамызды қоса алғанда, оны бәрі жақсы көреді. Телефоныма қоңырау соққан кезде алғашқы кезекте «Алуа қалай?» деген сұрақ естіледі, ал мен «Мен де сіздің немереңізбін ғой» деп ренжіп жатамын. 

Орасан зор жоспарлар

Біз қызымыздың алғашқы туған күнін мерекелеуге дайындалып жүрміз: біздің міндетіміз – «шашын өсіру, сәнді көйлегі дайын». Содан кейін, қызымыз осы жаста қандай іспен айналысуға болады, сол істің бәрімен айналысады, өзіне не ұнаса, оның бойындағы сол қасиетті дамытамыз. 

Менің бойымнан да қалыптасу кезеңі өтіп жатыр: жүктілік кезінде мен 28 килограмм салмақ қостым. Алуашаның салмағы – 4300, бойы 56 сантиметр болды. Қазір 83 сантиметр, бойы жағынан бір жастағы балалардан да ұзын. Қызым туғаннан кейінгі алғашқы үш айда өзіме белсенді түрде қарап, 20 килограмм тастадым. Енді алты килограмм қалды, жақында оны да түсіремін де, өзімнің 54 кг ораламын. Жоғарыда атап өткен Қытай емханасында маған емдеу әдісі ұнады: кез келген «химияға» жол берілмейді, шөппен, уқалаумен, ине салумен ғана емдейді. Олар жеке органды немесе нақты ауруды емдейді де, жалпы энергияны, янь мен иньді қалпына келтіреді, содан кейін ем өздігінен жүреді – ағза өзін-өзі емдейді. Дәл осы іспен мен қазір шұғылданып жатырмын. 

Қызымның туған күнін қатты күтіп жүрмін, бұл ары қарай даму үшін өзіме қойып қойған әлдебір меже сияқты. Шындыққа айналдырғым келетін арманым – Мәскеуде барған орталыққа ұқсас орталықты Алматыдан ашу. Бұл орталыққа арнайы балалар мейрамханасын, ойын-сауық орталықтарын, ойлау мен тілді дамытуға арналған оқыту бағдарламаларын ұйымдастыратын болсақ, бұл аса қажет болмақ... Осының бәрін тізбектеп айтып отырғанның өзінде-ақ соны барынша тезірек жасауды жоспарлап отырмын. Меніңше, бұл керемет болмақ! 

Модельбизнесін сағындың ба дейсіз бе? Шынымды айтсам, мен үшін бұл іспен айналысу жалықтырып жіберетін сияқты, психологиялық тұрғыдан-ақ менің жасым сәйкес келмейді. Күні бойы келбетіме қарап, сәнді киімімді ауыстыра алмайтын едім, жұлдыз болу, менмендік жай-күйі мен үшін бөтен … Оның бәрі мен көз алмай қараған көпшіліктің назарында қалды, енді маған басқа дүние қызықты. Сенің сұлу екеніңді біреудің растағаны міндетті емес, ең бастысы - өзіңді сұлу, қызықты әрі ақылды сезінсең, артыңда қорғаушыңның, отбасыңның, болашағыңның бар екенін білсең болғаны, бұл жылтыр журналдың беттеріндегі фотосуреттерден де анағұрлым жақсы сезім. 

Мәтіні: Жанна Мушраунованікі

Төлеш Дана. «Мен үшін құтты сан  - 22».//Сезон. 2004, тамыз – қыркүйек.