Олжас Қуанбай. Олжас Бекенұлы Қуанбай таудай талабымен қуантады.// 27.02.2004

Бұрынғы ата-бабаларымыз «Адам болар баланы талабынан танисың» - деп бекер айтпаған сияқты. Жауқазын жастардың арасынан өмірге құштарлығы басым балғындарды көргенде, мәртебең өсіп, марқайып қаласың. Олардың ертеңгі болашағымен ел сүйсінер деңгейде боларына ешқандай да күмән келтіре алмайсың. Мемлекетіміз бен қоғамымыздың мүддесін де солардың қорғайтынына үлкен үміт арта аласың.  Өз ортасын жарып шыққан ондай талантты балғындар арамызда аз емес. Солардың қатарына таудай талап арқалап келе жатқан Республикалық мамандандырылған дарынды балаларға арналған қазақ тілі мен әдебиетін тереңдетіп оқытатын мектеп-интернатының сегізінші сынып оқушысы - Олжас Бекенұлы Қуанбайды ұялмай жатқызуға болады. Ендігі әңгімеміз аз да болса Олжас туралы сыр шертпек.

Осыдан екі-үш жыл бұрын Қарасай ауданына қарасты әл-Фараби мектебінде өткен игілікті бір шараға қатысқанымыз бар. Жиын соңынан оқушылар өз өнерлерін көрсете бастады. Сонда шынашақтай ғана ақ құбаша баланың өнері талайға таңдай қақтырды. Сахна төрінде өзін еркін ұстап, бәйгеге қосылар тұлпардай шабыс тілеген Олжас көнеден келе жатқан жыраулардың термелері мен өлеңдерін қырандай саңқылдап, бірінен кейін бірін алма-кезек оқып жатты. Сол сияқты қалың жұртшылықтың дуылдата қол соққан сұранысы бойынша біраз әндерді де орындап тастады. Ұстаздар мен ата-аналар қауымы бұл баланың тегін талант емес екенін айтып, ауыздарының суы құрғағанша мақтап, мадақтап жатты.

Шынында да, «Халық айтса, қалт айтпайды» деген қағиданың тегін емес екеніне біздің көзіміз жете түсті. Олжас еңбектеп ес білген шағынан көркем сөз оқуды өзіне етене жақын тұтыпты. Бұған бір жағы ата-анасының да тигізген ықпалдары ерекше деп айту керек. Әкесі Бекен қарапайым жүргізуші болғанымен, қазақ әдебиеті мен әлем әдебиетін бір кісідей білетін адам десек қателесе қоймаймыз. Ал анасы Алтынхан Сыдықова болса, қазақ тілі мен әдебиеті пәнінің мұғалімі. Екеуі де Олжастың осынау талабын дер кезінде танып білген. Және де балауса балапандай баптауды екі жақтан қолға алған. Оның беріп отырған жемісі де жаман емес. Олжас ортасынан оза шығып, өзін талантты шәкірт ретінде танытып келеді.

Олжас тек терме, жыр, ән айтумен ғана шектеліп қалмаған. Сонымен бірге, өз жүрегінен шығарған өлең өрнектерімен де белгілі. Өткен жылы оның талантты ақын балалардың басын құраған «Жетісу жауқазындары» топтама жыр жинағына бір топ өлеңдері кірген. Сол сияқты, республикалық «Мөлдір бұлақ», «Ақ желкен» журналдарына жиі-жиі тырнақ алды өлеңдері шығып тұрады. Талантты шәкірт сонымен қатар, суретшілік өнерді де өзіне сенімді серік еткен. Оның қаламынан туындаған табиғат тамашалары, күнделікті өмірдегі айшықты көріністер кімнің болса да назарын аудармай қоймайды. Ол суреттері де жаңағы аталған басылымдарда жарық көріп, халықтан лайықты бағасын алып жүр. Олжастың осындай жан-жақты өнеріне тәнті болған өнер тарландары Алтынбек Қоразбаев пен Алма Алтай арқасынан қағып тұрып, ақ қағазға жазып тұрып, ақ баталарын берген.

Халқымыз «Жігітке жеті өнер де аз» деп тектен-текке айтпаса керек. Мен үшін осы сез Олжасқа арналып айтылғандай көрінеді де тұрады. Оның себебі де жоқ емес. Ол қолөнер жағынан да алдына жан салмайды. Олжастың қолдан жасаған қамшылары, сандықтары, жозылары, ұршықтары, тамырдан жасаған жыландары, пейзаждық суреттері еріксізден елжірете назарыңызды аударып өзіне қарай баурай түседі. Мұндай өнер түрлерімен айналысу кез келген баланың қолынан келе бермейді. Ал Олжас болса бір өзі ғана ұршықтай айналдырып, жан-жақты меңгеріп алған. Сегізінші сыныпта оқитын Олжастың осындай қадамы барған сайын ширығып, есу баспалдақтарымен қалыптасу үстінде.

Ал енді Олжастың мына бір талантты қырына кім болса да тәнті боларлық. Шексіз романтика мен қиялға беріліп жүретін Олжас соңғы кездері еліміздегі ешбір автокөліктерге ұқсамайтын автокөлік модельдерін салуды өзіне басты мақсат етіп ұстанған. Бұл ұмтылысы жеміссіз емес. Ол бүгінгі күнге дейін үш мыңнан астам автокөлік модельдерін өмірге әкелген. Оның мынау талабын көрген қалың қауым қапы ризашылықтарын білдіріп, сәт тілеуде. Келешекте оның осы еңбектері ел игілігіне жарап жатса, ол үшін бұдан асқан бақыт жоқ. Оның қазіргі арманы - дизайнер немесе халқымыз қастер тұтқан жыр- термелерді орындап өз тұғырына көтеру, ұлттық дәстүрімізді дәріптеу. Олжас Бекенұлының осы саладағы жетістіктері үшін алған мақтау және марапаттау қағаздары өзінше бір төбе боларлық. Ол осындай дәрежеге жеткізген ұстазы Жібек Ережепова мен тәрбиешісі Мая Көшкінбаеваға балалық жүрегімен ақ ниетті алғысын білдіреді. Алыстағы арманына қарай құлап сермеп бара жатқан Олжас Бекенұлы Қуанбайдың құлшынысы құштарлық. Оның келешегінен көп үміт күтуге болады.

- Мен өз басым бала болсам да, өмірге құштарлығы жоқ адамды өлген адамдардың қатарына жатқызамын. Бұл сезімге таң қала қоймаңыз. Кітапты көп оқығандықтан ба өмір өзгерістеріне орай, осылайша санама сіңіп қалды. Естілердің сөзін есінде ұстаған адам да есті болады деген рас екен. Өз басым ұқыптылықты, жинақылықты, тазалықты, қолға алған жұмысымды тап-тұйнақтай орындауды бұлжымас заңға айналдырғанмын. Менің өмірге деген, өнерге деген іңкәрлігім осындай, - дейді Олжас.

Жауқазын жастың айтқандарында ешқандай да жасандылықтың, жалғандықтың көрінісі сезіле қоймайды. Бала атаулының қашан да шындықты айтатыны белгілі ғой. Олжас Бекенұлының өз қатарларына қарағанда оқ бойы озық тұрғанын әркім де жоғары бағалайды. Жақында ол туралы еліміздің теле-арналары жақсы хабарлар берді. Осының өзі-ақ Олжастың тегін талант емес екенін дәлелдеп бере алады. Сол сияқты, ол туралы мерзімдік басылымдар да қуана құптайтын материалдар жазды. Біз де ендеше өнер жолындағы сапарың сәтті болсын, Олжас демекпіз.

Олжас Қуанбай. Олжас Бекенұлы Қуанбай таудай талабымен қуантады.//27.02.2004

Сканерден өткізілген нұсқасы

Бет 1